بہ پھم اِت ووٹ پنڈیں باجوانی ھنُراں۔۔۔۔۔۔نبشتہ:منہاج مختار

Jun 9, 2018, 4:17 pm

من ھمے ووٹ پنڈاں چے لھتیں جسُت کنگ لوٹاں کہ لوگ پہ لوگ انت۔۔۔شما آروچی کُجا بوتگے کہ گوادرءِ سودا گوں چائناءَ جنگ بوتگ کہ ھمے سوداءِ پُشدر ءَ سدانی ھسابءَ ھلک ءُ میتگ لڑّینگ بوتگ انت ءُ ھزارانی کچّءَ زھگ ءُ زالبول پیرءُ ورناھ گرگ ءُ بند کنگ یاکہ شھید کنگ بوتگ انت؟
شما کجا بوتگ اِت ھماروچاں کہ مشکے،آواران،ڈیرہ بگٹی،پنجگور،تمپ،دشت ءُ آدگہ جاھاں پاکستان ءُ ُ چائناءِ بمبگواریں بالیگاں میتگ ءُ کوھانی سرا بمب گوارتگ زھگ ءُ زالبول بازیں کماشءُ ورناھ شھید بوتگ انت؟
کجا بوتگ اِت شما ھماروچاں کہ ماما قدیر، بانک پرزانہ مجید،ُ کسان سالیں حیدرجانءِ گوں ھمراھانی پادانی تراول کس ءَ چارت نہ کتگ انت۔۔۔آ کجام سوک اِنت کہ ماما قدیرءُ نصراللہ بے ساھیں عکسانی گوما نشتگ ءُ جیڑگ ءَ اَنت شما کُج اِت؟
کجام درورءَ بدیاں کہ شمے وپتگیں،ابدم،بزاں زمیر جہ بجنت ،بلئے۔۔۔ ناں! پرچا کہ شمارا اے بزگیں بلوچانی درد پرِنہ اِنت بلکیں شمے درد بلوچءِ ھونانی سوداگری اِنت ،بلوچ سرزمین بیوپاریِ اِنت ،مڈیانی پلُگ انت۔۔۔۔ اگاں شمارا اے نیزگاریں بلوچ ءِ درد پر بوتیں شما اے گپ نہ جت کہ منا ووٹ بدی اِت بلکیں شما بلوچستان ءِ کُلّیں پارلیمانی پارٹیاں الیکشن بائیکاٹ ءِ گپ جتگ اَت۔۔۔
لھتیں روچ پیسر میر اصغر رندءِ یک ویڈیوے منی دیما گوست کہ آ لوٹ کنگا اَت کہ بلوچ راج اے رندی منا ووٹ بدنت ءُ مارا وتی نمائندہ بکنت، اے لوٹے ھم کتگ ات کہ پولنگ اسٹیشناں آرمی نندارینگ بہ بیت کہ اودا ردیں ووٹ دور د ئیگ ءَ میل اَنت آیا آرمی ءِ کار پولنگانی سرا نندگ اِنت یا کہ سیمسرانی پہریزگ انت۔۔۔
منی واجہ تو کمے گوست ءَ چمشانک بدے پاکستان ءِ گچینکاریانی پُشدرءَ بچار کجا ساپءُ پلگاریں گچینکاری بوتگ کہ اے رندا بیت من واجہ اصغر ساھب ءَ جست گِرگ لوٹاں ترا دہ سال بیت تو کُجا بوتگے تو اِنچو سرپدے کہ تء بُنکی میتگ گومازی نوگو ایریا جوڈ بوتگ چاریں آتراپاں آرمی ءَ وتی بنجل جوڈ کتگ انت؟تو اِنُچک سرپدے کہ تمپ ءِ کش ءُ گوراں ابید گومازیءَ چنچو ورنا گارءُ بیگواھ چُنت زھگءُ زالبول کماش ءُ ورنا شھید کنگ بوتگ؟
اشاں ابید تو اِنچو سرپدے کہ تئی سنگت شھید چیرمین دوست مھمدءُ آئی ورناھیں بچ کئیا جتءُ شھید کت انت؟اناں واجہ تو سرپد نھے پرچا کہ ترا اشانی سماءِ پر نبوتگ پرچاکہ شمے مکسد دگربوتگ انت...چہ ترا چے ملنگ صدیق گھتر اَت کہ یک بے وانندھے اَت بلے وتی میتگ ءَ زھگ ءُ زالبولانی کم شرپی دیست نہ کتُے پاکستانی فوج ءَ گوں جنگ دنت چنت فوجی جنت داں ساھے ماں فوج ءَ گوں جنگ کنت ءُ شھید بیت وتا بلوچ راجدپترءِ تھا نمیران کنت۔۔۔ بژنی ھبرے کہ شمے وڈیں مردمانی نامانی دیم ءَ بلوچ نبشتہ انت ءُ بلوچانی گورا پہ ووٹ ءَ کائے۔۔۔
اشی ءَ پد من واجہ رؤف رندءِ عکس دیستاں کہ دشت ءَ لوگ پہ لوگ انِت ووٹ ءِ پنڈگءَ تو واجہ کجا بوتگے اِنچو وھد انت دشت ءِ گیشتریں مھلوک پادکنگ ءُ لڑینگ بوتگ ھر پانچ کلومیٹرءِ سرا آرمی ءَ وتی بنجل جوڈ کتگ۔۔۔بلوچ زالبول چست کنگ ءُ وتی بنجلانی تھا برگ بوتگ انت وڈوڈیں ٹارچر کنگ بوتگ انت۔۔۔ کماش زھگ چست کنگ شھید کنگ بوتگ انت ءُ انگت اشانی رد برجاھ انت تو کجا بوتگے مرچی پہ گچینکاریءِ ھاترا جاھے پہ پرس ءِ نیمون ءَ جاگھے تو سیادءُ وارث درگیج ئے کمیّ بزّگ بکن اِت اے بزگیں راج ءِ سرا۔۔۔۔۔!
ھمے درگت ءَ ڈاکٹر مالک ءُ نام نھادیںُ سروزیرقدوس بزنجوءِ گُشگ انت کہ انوں گرم انت وو ٹ ءَ مھلوک اتک نہ کنت۔۔۔ بلوچ راج ءَ زاناں کدی گُشتگ بیا ات بلوچستانءَ ووٹ بکن ات بلوچانی لوٹ آزاد بلوچستان انت اِنچو ورنا کماش زھگ زالبول پہ پاکستان ءِ اسمبلیانی مھکم کنگے واستہ ناں بلکیں آپہ وتی سرڈگارءِ رکینگ ءِ ھاترا شھید بوتگ انت۔۔۔۔ اشانی مو ل ءُ مراد ھمیش انت کہ دگہ لھتیں بلوچ کوشارینگی انت پرچا کہ دانکہ پاکستان ءِ گچینکاریانی جار پرینگ بوتگ گڈا بلوچستان ءِ گیشتریں ھندءُ دمگاں آپریشن تیز کنگ بوتگ بلوچ ورناھانی گروبند شھید کنگ بندات کتگے۔۔۔گڈُ سرا من وتی بلوچ راج ءَ گوں دزبندی کناں کہ اے وڑیں مکّاریں ووٹ پنڈانی مکر ءُ ھنرُاں بزان اِت سرپد بہ بئیت کہ اے مئے شمے دروار نہ اَنت اے وتی زاتی نپ ءُ سیتانی ھاترا گوانزگانی چیرانی پتُرگ ءَ اوں اے وھداں عئیب نہ کن انت بلئے اشاں انچش بہ گّلین اِت کہ اے وتی آھگ ءَ بزان اَنت رؤگءَ مزان اَنت۔
شمے دوست ھما انت کہ سُھرسریں تیرانی دیمپان اَنت شمے دوست ھما انت کہ پاکستان ءِ ازیت گاھانی تھا پہ شما ھر وڈیں ازیت سگّگ ءَ اَنت شمے ھمبل شھیدانی وارث اَنت۔اے ووٹ پنڈ مئے شمئے گلامی ءِ مھکم کنگ ءِ پندلانی سازوک اَنت، اشاں سرپد بہ بئیت اِشاں بزان ات ھمے وڈا کہ شما دوھزارسیزدہ ءِ گچینکاری بے سوب کتگ انت آؤکیں گچینکاریاںَ بے سوب بکن ات۔

پاکستانی گچینکاری بے سوب بات اَنت
بلوچ جھد پائندگ بات

تازہ ترین خبریں