واب چہ بلوچستانءَ پہ بلوچستان ءَ ,, اسرار ایوب بلوچ

Aug 8, 2016, 11:35 pm

بلوچ راجی جنز چہ بازیں جہل ءُ برزی آں
ایرکپان ءُ سر کپان ءَ دیمءَ جنزاں اِنت۔ ایشی ءِ ردوم ءُ دیمروی ءِ تہا مستریں بہر ہما ورناہانی اِنت کہ آہاں وتی ہیسی سر باہینتگ انت ءُ چہ وتی ھونانی تلاہیں وژبوہاں چہ سرڈگارءِ ہر ہند ءُ دمگ آتار کتگ۔ ہر بلوچے کہ ھاوندءَ آئی را چہ زانت ءُ سسّاءِ سوگات ءَ بہر مند کتگ گڈا آچہ اے ھیسی سرانی راجی ھذمت ءُ دیم ھونی آں چے ہچ پیم شموشکار نہ بیت ۔بلوچ راجی جنز کہ مروچی وتی دومی دھک ءِ مساپت ءَ دیم پہ منزلے جنزان اِنت ہماراجی رہشونانی سسّا ساچی ءِ منہ وار انت کہ آھاں زمین زادگی ءِ میار ءَ وت ءَ وتی کرد شوناتگ ۔ راجی جنز ءِ تپش پہ سارتی ءُ تمگ ءَ نہ اشتگ ،راجی پجار ،زبان ءُ زمین ءِ ارزشت ءِ پہازگ ءَ پہ وازگ ءَ بوتگ انت ،جیڑگ ءَ بوتگ انت بلے ہمے پند ءِ تہا لہتیں ھنچیں راجی بامرد ھست کہ آچہ وتی کرد ءُ سسّا ساچی ءَ پہ جنز ءَ یک گلے ءِ بستار ءَ دارنت،بل کہ آمروچی مئے میان ءَ ساڑی نہ انت وھدءِ ایروپ ءَ مانرپت ءُ اچ ما گستا کت انت بلے آہانی کرد پہ لگت مالیں راج ءَ نمیران انت ءُ آھاں پہ پشپداں جیڑگ ءِ کلیں راہ ءُ در بوتکگ انت ۔بلوچ راجی بامردانی اے لڑءِ تہاواجہ غلام محمد بلوچ ،ڈاکٹر منان بلوچ ءُ حاجی رزاق بلوچ ءِ نام چو روچ ءِ رژن ءََ ہرکسی چمانی آدینکءَ سھرا انت ،چوناھا بلوچ راج دپتر ءُ بلوچ راجی آجوئی ءِ جنز ءِ تہا سداں بامردھست کہ آچہ ستاءُ توسیپ ءِ سیم سراں آدست انت منی وڑیں ناپوہیں ندکارے ءِ گاجیلیں لبزانی چے بستار کہ پہ آھانی کردءَ بہ گال انت ھمک لبز وتی مانا ءِ بستار ءَ پہ آھانی کردءِ سجدگءَ دؤردنت شہید غلام محمد بلوچ من پہ وش اتکی دیستگ اَت ءُ شہید حاجی رزاق پہ گدارے بلئے شہید ڈاکٹرمنان بلوچ من وتی چم پچیں آگاہی ءَ ماں وابے ءَ ڈاکٹر اللہ نذر بلوچ ءِ یاگی ایں تب ،شہید غلام محمد بلوچ ءِ سگاریں بیہار ءُ خلیل بلوچ ءِ شئے مریدیں پند ے پجیگءَ کوارءَ بستگ اتاں،چہ بلوچستان پہ بلوچستان ءَ ،سپر کنگ ءَ ات ءُ منزلے بلوچستان اَت ۔آئی ءِ سپر تہا من وتی سپر ءِ اولی پدانکءَ ڈیک داتگ اَت،وت ءُ شہیدعابد شاہ ءَ منی بلوچ بلوچ اشت ءُ سٹوڈنٹ ءَ را نیشنل کُت ءُ آرگنائزیشن ءَ موومنٹ کُت منادات کہ ایشی ءَ بزوربڈا بہ بند ،داں کجا کہ گوں تو شُت کنت ،بہ برے ،من پہ ہنر ءُ ہیلہ دگرے اَچ وت یک گامے ءَ پیسرکُت ءُ آئی ءِ بڈا دات ،ڈاکٹر ءَ پہ گدارے منی نیم ءَ چارت تہ منا ھنچوش سمابوت کہ ڈاکٹر ءَ وتی گپ گوں وت داشت ہمے میاں نءَ شہید آغا عابد شاہ ءَ ٹہک دات ءُ منا گوْشت سنگت تنیگہ مئے تہا انگت منافقت ھست ،پدازوتاں شہید آغا آوار جنگ بوت آوار جنگءِ روچءَ منی دومی منافقت اَت کہ نزوک ءَ اتاں بلئے پہ آئی ءِ گندک ءََ نہ شتاں اگاں ناں مروچی نہ منافق پشت کپتگ اَت ءُ نئے کہ منافقت ءِ کسہہ کار ۔۔۔من وتی مساپت ءِ دومی پدانکءَ ماں جھاؤکہڑو ءَ 2010ءِ بلوچ نیشنل موومنٹ ءِ کونسل سیشن ءَ گو ں ڈاکٹر صاحب ءَ ڈیک داتگ ات بلئے اِدا چہ ڈاکٹر ءِ جند ءَ چہ گیش آئی ءِ کرد منی چمانی دیم ءَ سھرا ات ،ہر درءُ دمک ،ہر راہ ءُ دگ ،ہر درچک ءُ دار ڈاکٹر ءِ زبان ءَ ھبر کنگااتاں ۔
اے ہما دؤر ات کہ بلوچ نیشنل موومنٹ ادارکی کارمستر عصاظفرگوں وتی ھمراہاں چہ بلوچ نیشنل موومنٹءَ در کپتگ ات ،چہ شہید غلام محمد ءِ شہادت ءَ چہ رند اے ویل پہ بلوچ نیشنل موومنٹ ءَ دومی مستریں ویل ات بلے شہید ڈاکٹر ءَ بلوچ نیشنل موومنٹ ءِ ریزگاں ءَ ھنچوش پہ گوْمے نزارتگ ات کہ شہید غلام محمدءِ شہیدیں ارواح بچکندگ ءَ اَت ءُ بلوچ راج ءَ وتی باندات ءِ دامن گوں بلوچ نیشنل موومنٹ ءِ بیرک ءَ ڈک داتگ ات ۔زانت ءُ زانگ ءَ وتی بنجل بلوچ نیشنل موومنٹ کتگ ات ءُ ایشی ءَ ھوار لہتیں ھنچیں بند ءُ بوج ہمے کونسل سیشن ءَ بوت کہ پہ جنزءِ ھنڈالانی مہکمی ءَ ھژدری ءُ باندات ءِ مستاگیں سباہءِ توجیل اتاں ،ھمدا چہ بلوچ نیشنل موومنٹ ءَ وتی نوکیں سپر گوں آشوب ءِ ارزشتی ئیں توشگاں بندات کتگ ات ءُ پدا ڈاکٹر چہ بلوچستان ءَ پہ بلوچستان ءَ رہادگ ات ،پہ مرادیں منزل ءِ وش اتکی ءَ شپ جاہ ءُ روجاہ ات ،جنز ءِ سپر روچ پہ روچ نوک ءَ چہ نوک تر ءُ سلھ ءَ چہ سلھ تر بیان ات آشوب رودیں سسّا مہکم بیان ءُ منزل ءِ جلشک شپ جتیں بنی آدم ءِ ارواھان انگیر کنانءَ شپءِ دامن ءَ چاک دیان ءَ روچ ءِ دیدوکاں ایر رچان ات کہ نستگ تالہیں ندکارانی رمبے میان ءَ مان کپت پہ ایراد گیری ءِ نام ءَ کہ جنز ءَ وتی کلیں سپر کٹینتگ تہنا پہ ایراد گیری ءَ نوں پشت کپتگ اے نباشد کلپ ءُ بقول ڈاکٹر ناگمان ءَ نیم کندانکیں دانشوراں پہ سرکار ءَ ہما کار کُت کہ پیش ءَ اللہ ءَ ھوں کُت نہ کتگ ات اے نیم کندانک ہر بامردءِ کردءَ گوں وتی کارچیں ندءَ راڑکنان ءُ سرکار ءِ کچکیں ھوشام ءَ ایرمادکنان اتاں ،راجی بامرد ءُ راجی گلانی بستارءَ دؤر دیگ ءِ جہد ءَ اتاں ،ناڈاکٹر صاحب رُنگ راہے ءَ ایر کپت نا بلوچ نیشنل موومنٹ ءِ لیڈرشپ ءَ گل ءِ بستار پہ لیلامی ءَ اِشت ،بلکن بی این ایم ءَ ڈاکٹر صاحب ءَ آشوب رودیں سسّا ئے ءِ مہمکی ءَ پہ وتی گامگیج ترْند تر کت انت ۔اداچہ من سپر ءِ سیمی پدانک ءَ گوں ڈاکٹر صاحب ءَ ھوار اتاں ڈاکٹر صاحب ءِ بلوچستان اَت ۔۔۔بلوچی اَت ۔۔۔گل اَت۔۔۔آشوب رودیں سسّااَتءُ پہ مئے ارواح ءِ شاتکامی ءَ نیم کندانکیں دانشورانی زاہ ءُ بداتاں ،روچ پہ روچ نوں زاہانی تہا جدت آھگ ءَ اَت ۔جمالیا ت مان کپتگ ات بلئے اشانءَ نہ ڈاکٹر صاحب ءَ کمار کُت نہ ہما راجی گلاں کہ آھانی ھنڈال بلوچ راج ءِ تہا ایر کپتگ ءُ مہکم بوتگ اتاں ڈاکٹر بلوچستان ءَ پہ وازگ ءَ ات ۔۔۔بلوچی زبان ءَ پہ وازگ ءَ ات ءُ بلوچ راجی گل بلوچ نیشنل موومنٹ وازگ ءَ ات بلئے ڈاکٹر صاحب ءِ گیشتریں جہد ہمیش ات کہ بلوچ راجی جنزءَ را چتور یک سلّھ ئیں آشوبی دروشمے ءَ رجگ بہ بیت پمیشکا آئی جیڑتگ ات کہ جنز ءَ را یک مہکمیں گلے داشت کنت ہما گل کہ سرجم ءَ آشوبی بہ بیت ۔
کجام گل سرجم ءَ آشوبی بوت کنت؟
ہما کہ آشوبی لیکہاں ردوم دات بکنت ۔
کجام گل آشوبی لیکہاں رودم دات کنت ؟
ہما کہ روایتی لیکہاں پروش بہ دنت ۔
کجام گل روایتی لیکہاں پروشت دات کنت؟
ہما کہ آئی ءِ ادارہ مہکم بہ بنت ،ادارہ سازی ءِ عمل ءِ تہا اوشت مہ ئیت ۔گڈا ہما گل مروچیگیں جاور ھالانی تہا زندگ بوت کنت ءُ راجی زندمان ءِ رکھینگء مانزماں بوت کنت ءُ مدام آئی سکین ہمیش ات دانکہ ساہ کشگءِ موہ کسے ءَ رسیت پہ راجی زندمان ءِ رکھینگ ءِ واستہ کار بکنت ۔جنزءَ را یک آشوبی گوناپے ءَ رجگ ہمے پدریچ ءِ کار انت ۔آئی پہ جنزینوک الّم درکپیت ،آئی ءَ بی این ایم وتی زندماں لیکھتگ ات ءُ شہادت پہ وت ءَ معراجے ۔۔۔ہمے لیکہ ءِ تونگریءَ پہ آئی وتی سسّا ساچی ءِ سپر بندات کتگ ات گڑا ڈاکٹر صاحب ءَ بی این ایم ءَ را یک راجی گلے ءِ بستارءَ بلوچستان ءِ کلیں آپ بنداں بُرت ءُ سرکت ۔نیم کندانکیں دانشورانی ہمے گوْشتن کہ بلوچ نیشنل موومنٹ تہنا آواران ءُ مکران ءِ دمگاں ھست ءُ نیست ءِ مساپتءِ میان ءَ سپر کنگ ءَ ایں ،پہک رَد کُت۔
2014ءِ کونسل سیشن ءَ بی این ایم ءَ را یک آشوبی گوناپے ءَ رتک ءُ راج ءَ رارسینگءِ پند پادان کُت ڈاکٹر صاحب ءُ آئی ھمراہانی جہد ءِ سوْب ءَ مروچی بی این ایم ءَ بلوچستان ءِ کلیں دمگاں وتی بستار نامینتگ ءُ چہ بلوچستان ءَ ڈن میان استمانی سیم سران سر بوتگ ءُ بلوچ راج ءِ راجی گل ءِ بستار ءَ زانگ ءُ پجارگ بیت ،بلئے ڈاکٹر صاحب ءِ بے وھدیں شہادت پہ بلوچ راجی جنزءُ بی این ایم ءَ اے دھک ءِ مستریں ویل ءُ تاوان لیکک بیت ءُ آئی ءِ کمی ءَ بلوچ راج داں سداں سال ماریت بلئے اے راج ءِ وش بہتی انت کہ ڈاکٹرءَ بی این ایم پہ جہدءُ جکانسری ہمونچک ءَ رودینتگ ءُ لائک کتگ کہ بلوچ ءِ راجی جنز ءَ داں منزلے ءَ برگ ءُ رسینگ ءِ ھاٹیگءَ داریت ءُ ڈاکٹر صاحب ءِ کردءَ مروچی ھما نیم کندانکیں زانوگران ءَ پشل کتگ کہ داں آزیک ءَ بلوچ راج پہازانی پُچکاں بوتگ انت بلئے مروچی وتی ھستی ءِ پولگ ءَ پہ ہمے درانی سوالیگ انت ۔مروچی مارا استمانی ءُ میاں استمانی تک ءَ بازیں پندلاں انگیر کتگ ۔یک گوْرے دژمنیں استان ءِ نیشنل ایکشن پلان ،پروٹیکشن آف پاکستان آرڈینینس انت کہ میان استمانی تک ءَ دژمن ءَ ایشان ءَ دہشت گردی ءِ ول گوْج کنگءِ نام دات ءَ بلئے گواچن ءَ ایشانی بنجل بلوچستان انت ءُ پہ بلوچ راجی جنزءِ ایرموش کنگ ءَ پہ کارمرز کنگ بوھگ ءَ انت ۔دومی نیمگ ءَ میاں استمانی سامراجی کول بند (معاہدات )انت چُش کہ CPEC،TAPI،IPIہمے گونگیں دگہ بازیں سامراجی کول بند است انت کہ آھانی بنجل بلوچستان انت اے کلیں شئے پہ بلوچ راجی زندمانءَ سیاہیں پال انت ۔استمانی ءُ میان استمانی تک ءَ ایشانی گرءُ دار ءُ ھنڈالانی ول گوْج کنگ پہ بلوچ راجی زندمانءُ راجی جنزءِ ھیات ءَ پہ المی انت ءُ راجی جنزءِ ھستیں سپر ءِ تہا ھما نگیگی ءُ سست ءُ سیل کہ مئے دیم ءَ دراہی کنان انت ،ایشانی چار ءُ ٹپا س ،گرءُ دار وھد ءِ لوٹ ءُ زلورت اانت ءُ ہما واب کہ ڈاکٹر صاحب ءَ پہ بی این ایم ءُ بلوچ راج ءِ باندات ءَ دیستگ ات ءُ وتی واب ءِ مانا ءِ پولگ ءَ درکپتگ ات نوں آواب ءِ مانا ءِ پولگ پدمنتگانی کوپگاں انت داں کہ ڈاکٹر صاحب ءِ واب مانا نبوتگ آئی ارواھ ءِ وامدار اَنت ۔

تازہ ترین خبریں